IChiefs idinga uMessi noma uRonaldo ukufaka amagoli - Inkakha

2017-12-07 14:00

Cape Town - Lowo owayedlalela iKaizer Chiefs uMark Williams ukholelwa ekutheni le kilabhu idinga ukusayinisa abagadli abasezingeni loDidier Drogba, uLionel Messi noma uCristiano Ronaldo.

Amakhosi akuthola kunzima ukubhakuzisa inethi kule sizini, njengoba umdlali ohamba phambili kwiligi kunguGustavo Paez onamagoli amathathu nje vo ngaphansi kwegama lakhe.

UWilliams ukholelwa ekutheni kuzoyisiza kakhulu ikilabhu ukusebenzisa iwindi lokuthengiselana ngabadlali likaJanuwari ukuthola umgadli uzoyisiza.

Ukhulume neSoccer Laduma wathi: "Eqenjini elikhulu njengeKaizer Chiefs - ibhola lezinyawo limnandi ngokufakwa kwamagoli, abantu akumele bakhulume ngebhola elimnandi nje kuphela. Bazothi badlala ibhola elihle kepha bahluleka ukubhakuzisa inethi. Bayosala bexoxoa ngokwakha amathuba, kepha bahluleka ukuvalela amagoli.

OLUNYE UDABA: 'IChiefs ingamnika isipho esihle uMotaung ngokwehlula iDowns nePirates'

"Yingakho le kilabu idinga abagadli, uma behluleka ukwenza lokho bangangishayela ucingo bangicele ukuba ngifike ngizololonga abagadli.

"Ngicabanga ukuthi ikilabhu kumele izame ukusayinisa okungenani uDrogba uma ihluleka ukuthola uRonaldo noma uMessi - ungahleki, ngoba yikho lokho abakudingayo.

"Uma kukhona umgadli othanda ukungiphonsela inselelo, makaphumele obala simbone efaka amagoli wonke amasonto."

IChiefs izobhekana nePlatinum Stars emdlalweni wayo olandelayo ozoba seRoyal Bafokeng Stadium kowe-Absa Premiership ngoMgqibelo.

Umdlalo uqala ngo-15:30.

News24
«Emuva