I-ANC eKZN ithi ayiyidingi imvume ye-NEC ukuphikisa isinqumo

Ngu: Kaveel Singh, News24 2017-09-13 18:00

Durban – Ubuholi obuphezulu be-ANC KwaZulu-Natal sebugadle kwiNational Executive Committee bathi lesi sigungu esiphezulu asinazwi esinqumweni sabo sokuphikisa isinqumo senkantolo.

Lokhu kulandela ukuthi iNkantolo eNkulu yaKwaZulu-Natal ngoLwesibili iveze ukuthi ubuholi be-ANC obukhona manje esifundazweni bakhethwa ngokungemthetjo.

“Asazi ukuthi kungani i-NEC iphawula ngalolu daba ngoba emaphepheni asenkantolo kucacile ukuthi abamangali yibo abaphikisa isicelo, hhayi i-NEC," kusho uSihlalo we-ANC Youth League esifundazweni uKwazi Mshengu ngoLwesithathu.

UMshengu ubephendula lowo okhulumela i-ANC kuzwelonke, uZizi Kodwa, othe isinqumo sokudluliswa kwesinqumo senkantolo sizothathwa wubuholi bukazwelonke kuKhongolose.

UKodwa uthe ngaleso sikhathi, isigungu esiphezulu e-KZN kumele "sinikeze ubuholi bukazwelonke isikhathi sokubhekana nalolu daba" ngokubambisana nekomidi likazwelonke.

"Abameli bethu basacubungula isinqumo senkantolo. Kuwumsebenzi wethu ukubhekana nezinkinga ezikhona, kepha besingakahlangani nobuholi besifundazwe," kusho uKodwa.

UNobhala Jikelele we-ANC uGwede Mantashe naye uthe i-NEC kumele kube yiyo ethatha isinqumo.

UMshengu uthe isifundazwe kanye ne-PEC abazami ukudelela i-NEC.

"Ngokubona kwethu i-NEC kwakumele ibe yingxenye yalolu daba kusukela ekuqaleni. Kungani basiyekelela bese beqhamuka ekugcineni?"

News24
«Emuva